Góð samstaða

Feiki góð samstaða meðal hjúkrunarfræðinga, tæplega 64% þátttaka í atkvæðagreiðslunni og um 95% þeirra fylgjandi yfirvinnubanni og þar með hertum aðgerðum vegna kjarasamninganna. Um leið yfirgnæfandi stuðningur við forystuna.

Ég er mjög sátt, segi þó ekki að ég hefði viljað sjá þátttökuna um 90% en  engu að síður mjög ásættanleg niðurstaða, ekki síst í ljósi þess að margir eru í sumarfríum o.þ.h. 

Til hamingju með samstöðuna hjúkrunarfræðingar, þetta er hægt

94,6% vilja yfirvinnubann

Höfuðlaus her

Ástandið fremur bágborðið í minni fyrrum heimasveit. Búið að reka sveitarstjóran, einungis einn starfsmaður við störf á hreppsskrifstofunni, hinn í fríi. Bókarinn hefur ekki enn hafið störf, sá 3 eða 4 á stuttum tíma.  Enginn formlegur staðgengill sveitarstjóra skipaður til að reka sveitarfélagið þannig að í raun má segja að herinn sé höfulaus.

Fundargerðir farnar að berast á vef sveitarfélagsins en skv. þeim halda menn áfram uppteknum hætti, þ.e. að brjóta stjórnsýslulög. Menn ætla augljóslega seint að læra, þó má greina athugasemd frá hinum nýja minnihluta í fyrsta sinn við afgreiðslu mála. Nýji oddvitinn heldur áfram að sitja báðum megin við borðið en í þetta sinn lætur hann bóka að hann taki ekki þátt í afgreiðslu þess máls er varðar hagsmuni hans sem stjórnarmaður í hestamannafélaginu. Leggur fram tillögu um styrkveitingu en situr hjá við afgreiðslu.

Gekk reyndar ansi langt á þeim fundi sem endurspeglar annað hvort mikla vanþekkingu í besta falli eða beinlínis valdníðslu. Í fundargerðinni kemur fram sú tillaga oddvita að ,, Þar sem sú staða er uppi að allir fundarmenn nema einn tengjast með einum eða öðrum hætti þeim félögum sem um ræðir í lið 1 í fundargerð frá 10. júní 2008"  að ,,enginn sveitarstjórnarmanna teljist vanhæfur til að samþykkja liði  1 í fundargerðinni". Var sú tillaga samþykkt með 6 atkvæðum gegn einu. Sveitarstjórnin hefur í gegnum tíðina verið annáluð fyrir það að búa til eigin leikreglur í krafti meirihlutans þannig að þetta er ekkert nýtt. Staðreyndin er hins vegar sú að sjaldan hefur hún verið jafn opinská um  slíkar aðgerðir og nú.  Engin sveitarstjórn hefur það vald að breyta sveitarstjórnar- og stjórnsýslulögum að vild. Það gerist  í þessu tilviki þannig að klárlega er um ólögmætan gjörning að ræða þar. Í tilvikum em þessum verða menn að víkja og kalla inn varamenn, það er ekkert flóknara en það. Það jákvæða er þó það að einhverjir eru farnir að gera athugasemdir við stjórnsýslubrot af þessu tagi. 

Meðal umsækjenda um starf sveitarstjóra eru nokkrir reynsluboltar með viðamikla þekkingu á sveitarstjórnarmálum. Skv. nýjustu fréttum koma tveir umsækjendur sterklega til greina. 24 stundir nefna Grím Atlason, fyrrum bæjarstjóra í Bolungarvík í þeim efnum í blaðinu í morgun.  Orðrómurinn í sveitarfélaginu tekur undir  þau sjónarmið. Ugglaust er Grímur hinn mætasti maður og allt það, er þroskaþjálfi að mennt og mikil reynslubolti á sviði tónleikahalds. Þótti drífandi í Bolungarvíkinni, hæfileikaríkur músikant en jafnframt umdeildur. Hefur nú öðlast tæplega 2 ára reynslu á sviði sveitarstjórnamála. En dugar það til og er hann sá einstaklingur sem er best til þess fallinn að annast stjórnun í sveitarfélaginu þar sem hver höndin er upp á móti annarri, sem fyrr og allir sveitarstjórnarmenn eru að sitja sitt fyrsta kjörtímabil, fyrir utan einn? Svolítið sérstakt ef harður Samfylkingarmaður komi til greina.  Þeir sveitarstjórar sem eru ráðnir utan frá eiga hins vegar ekki að vera pólitískir en erfitt getur verið að komast hjá því. Menn grafa ekki yfirlýstar skoðanir sínar eða segja sig úr stjórnmálaflokkum svo glatt.  Þeir starfa náið með meirihlutanum, því kemur fráfarandi sveitarstjóri ekki til greina. Það yrði sérstakt ef Samfylkingarmaður yrði ráðinn en þeir eru þó nokkrir meðal umsækjenda.

Vonandi bera menn gæfu til þess að láta hagsmuni sveitarfélagsins ráða för við ráðningu svietarstjórans. Mig grunar að launakröfur muni hafa nokkur áhrif á val manna en fyrst og fremst þarf að velja skeleggan, drífandi og reynslumikinn einstakling sem hefur burði til að leiðbeina lítt reyndum sveitarstjórnarmönnum og tryggja að farið sé að stjórnsýslulögum við stjórnun sveitarfélagsins. Menn virðast ætla að hafa hraðar hendur á varðandi ráðninguna og er það vel enda enginn í brúnni. En menn verða að hafa hagsmuni sveitarfélagsins að leiðarljósi. Það þarf að sameina mörg ólík öfl og settla reiði og særindi meðal íbúa sem eru orðnir langþreyttir á vanhæfum sveitarstjórnum sem hafa haft hlutina eftir eigin höfði.

Hvort að 2 ár dugi til þess verkefnis skal ég ekki dæma fyrirfram en ansi er það hæpið. Líklega eru þeir kjörnu fulltrúar sem nú skipa sveitarstjórnina búnir að stimpla sig út úr pólitíkinni í náinni framtíð. Það verður sífellt erfiðara að fá menn til að taka þátt í sveitarstjórnarmálum, ekki síst vegna þeirrar valdníðslu sem hefur átt sér stað árum saman. Fórnarkostnaðurinn við að reyna að breyta hlutum hefur verið  hár og getur varðað afkomu og mannorð viðkomandi. Eina raunhæfa leiðin er að stækka sveitarfélagið suður fyrir brekku, þá fyrst eru líkur á því að stjórnsýslan verði gegnsæ og réttlát og hagsmunir íbúa hafðir að leiðarljósi. En við skulum sjá hver næsti kandidatinn verður, menn eiga ekki að gefa upp alla von um bjartari tíma.

Íbúðalánasjóður til bjargar

Er það svo? Menn hamast við að mæra áhrif breytinganna á stöðu einstaklinga. Miðað við brunabótamat en hámarkslán þó 20 milljónir. Hversu stóra blokkaríbúð er hægt að fá fyrir þá upphæð? Trúlega nóg fyrir  ungt og barnlaust fólk eða hvað?? Hvað með aðra aldurshópas em eru að eignast sína fyrstu íbúð eða jafnvel að byrja upp á nýtt?  Hvað með þá sem þurfa að skipta um húsnæði af einhverjum ástæðum?? Hvað með landsbyggðina?

Ég skil hins vegar ekki þörfina að koma bönkunum til aðstoðar vegna íbúðarlána sem þeir lánuðu til hægri og vinstri. Flestir ef ekki allir bankarnir eru að velta milljörðum-billjónum evra á ári. Kannski lausafjárstaða þeirra hafi rýrnað en þurfa þeir þá ekki einfaldlega að hagræða í eigin rekstri? 

Við skulum átta okkur á því að það voru bankarnir sem fóru út í samkeppni við Íbúðalánasjóð en ekki öfugt. Hvað vakir fyrir ráðamönnum stjórnarflokkanna? Halda þeir virkilega að menn séu með hausinn það djúpt í sandinum að þeir sjái ekki í gegnum þetta nýjasta útspil ríkisstjórnar?

Ég vil gjarnan horfa á jákvæðu hliðarnar en ég sé þær ekki margar í þessari stöðu. Eigi þetta að vera mótvægisaðgerðir ríkistjórnarinnar, hvernig verður framhaldið???

Ái!  Vonbrigðin eru all nokkur og stefna ríkisstjórnarflokkanna enn óljós í þessim atriðum sem og öðrum

Íbúðalánasjóður til bjargar

Vonbrigði :(

Var að fá nýjan kjarasamning Félags framhaldssólakennara og Félags stjórnenda í framhaldsskólum í tölvupósti sem samþykktur var í fyrrakvöld.  Þvílík vonbrigði, mig skal ekki undra þó hann hafi ekki verið sendur út á þjóðhátíðardaginn.

Samið um sömu krónutöluhækkun og aðildarfélög BSRB fengu. Fátt annað markvert í samningum, veikindadögum vegna barna yngri en 13 ára fjölgað um 2. Reyndar talað um 4% hækkun vegna tímabundins álags við breytinguna á framhaldskólalögunum sem óhjákvæmilega fylgir. Desemberuppbót hækkar um einhverjar krónur. Þar með er innihaldið upptalið. Eini ljósi punkturinn er tímalengd samningsins en hann nær fram í marslok á næsta ári.

Ég hefði haldið að einmitt vegna þeirra breytinga sem framundan eru, væri lag að ná betri samningum. Enginn vill hefja haustönnina með verkföllum. En nei, þetta samþykkti forystan. Enn á eftir að greiða atkvæði um samninginn og fróðlegt verður að sjá hver vilji félagsmanna er í þessum efnum.

Mig skal ekki undra þó hvergi sé minnst einu orði á samninginn í fjölmiðlum. Hann er snautlegur og því lítill akkur í því að leka honum út. Gáði til vonar og vara hvort félagsmenn væru beðnir um að þegja yfir þessum samning og væru bundnir trúnaði, fann ekkert slíkt ákvæði þannig að ég læt þetta flakka.

Ekkert kemur fram í aðsendum gögnum hverjar forsendur forystunnar væru við samþykkt þessa kjarasamnings, ekkert haldbært til að réttlæta samninginn. Hvað gerðist?  Ég er orðlaus.

Vonbrigðin eru gríðaleg og hef ég grun um að fleiri séu á sömu skoðun og ég. Ég get ekki annað verið en stolt af hinu stéttarfélagi mínu; F.Í.H. sem hefur gripið til aðgerða til að koma til móts við vilja félagsmanna sinna. Nú stendur yfir atkvæðagreiðsla um yfirvinnubann sem lýkur 22. júní nk. Ég trúi ekki öðru en að stéttin sýni samstöðu og taki þátt í atkvæðagreiðslunni. 

Við sem tilheyrum stéttarfélögum höfum atkvæðarétt. Það er bæði synd og leitt þegar menn ákveða að nýta ekki rétt sinn. Oft virðast menn einmitt ekki greiða atkvæði til að sýna í verki andstöðu sína en það er einfaldlega ekki rétta leiðin. Mér er enn minnistætt þegar samningur við aðildafélög BSRB var samþykktur með 33.4% greiddum atkvæðum. Rúm 66% félagsmanna kaus að nýta ekki rétt sinn. Það er mikið nær að fella samninga sem maður er ósáttur við en að sitja hjá, það eru einu skilaboðin sem eru réttlát, skýr og öllum skiljanleg.

Glæsilegt!

Alltaf gaman þegar ég les góðar fréttir úr minni fyrrum heimabyggð. Vinstri Grænir með formennsku í byggðaráði sem er valdamesta embættið í raun. Komnir í sterka stöðu.  Oddvitinn fær að baða sig í sviðsljósinu, þá eru allir ánægðir og langþráðu takmarki hans náð.

 

 

 

 

 

 

 

Umsóknir um starf sveitarstjóra sagðar vera hátt í 20 talsins sem eru feikigóðar fréttir og mikill léttir að fyrri fregnir voru rangar. Þær leiðréttast hér með. Það ætti að vera auðvelt að finna hæfileikaríkan einstakling til starfans úr þessum fjölmenna hópi. Fannst þó vanta æði mikið upp á þær kröfur sem gerðar eru til starfsins, ekki farið fram á reynslu og/eða menntun í opinberri stjórnsýslu svo dæmi sé nefnt. Virkaði á mig eins og það væri fyrirfram ákveðið hver fengið starfið en auðvitað getur mér skjátlast. Við sjáum til.

Vonandi eru bjartari tímar framundan í heima í héraði, ég leyfi mér alla vega að vera bjartsýna og vongóða um það eins og hægt er við þessar aðstæður. Ég reikna með því að málefnasamningurinn sé niðurjörvaður og vel ígrundaður ef ég þekki mína menn rétt. 

Þótt enginn geti snúið við

og byrjað að nýju,

geta allir byrjað núna

og endað að nýju.

(Carl Bard) 

Hei, hó jibbíei og jibbíei

Til hamingju með þjóðhátíðardaginn 17. júní. Vonandi njóta hans sem flestir í faðmi fjölskyldu og/eða vina. 64 ár liðin frá því að þjóðin hlaut sjálfstæði. Erum við tilbúin til að fórna því???

 

 

 

 

 

 

 

 

Leið okkar liggur ekki um grængresið

mjúka, hún er fjallvegur

og talsvert grýtt. En hún liggur

 upp í mót, áfram, í sólarátt.

(Ruth Westheimer) 

 

Alvara?

Ætli loks sé komin einhver alvara í samningaviðræður á milli ríkis og BHM eða skyldi markmið forsætisráðherra vera það eitt að skikka menn til hlýðni eins og sæmir föðurlegum  húsbónda?

Atkvæðagreiðsla innan Félags íslenskra hjúkrunarfræðinga um yfirvinnubann hafin. Fróðlegt verður að sjá niðurstöðurnar, hef alla trú á því að yfirvinnubannið verði samþykkt. Mér finnst forysta félagsins standa sig mjög vel og vinna hratt í málum eftir að hafa gefið samninganefnd og ríkissáttasemjara mikið svigrúm og sýnt þeim biðlund. Þeir samningar sem boðið er upp á eru ekki upp í nös á ketti og nálgast ekki einu sinni raunveruleikan.

Ég bíð í ofvæni eftir  fimmtudeginum.

Forsvarsmenn BHM boðaðir á fund ráðherra

Þungt í mönnum

Það ku vera nokkuð þungt í mörgum í minni fyrrum heimasveit. Ofurlæknirinn orðinn oddviti og sumir telja hann jafnframt vera formaður byggðaráðs. Vil ekki trúa því fyrr en á reynir. Aðeins frést um eina umsókn um starf sveitarstjóra sem kemur frá fráfarandi sveitarstjóra sem var sagt upp. Nokkuð víst að hann verður ekki ráðinn en mig undrar ekki þó fleiri sæki ekki um. Staðan til 2ja ára og starfsumhverfið hálfgerð ormagryfja. Ef ég man rétt, rann umsóknarfresturinn út á miðnætti. Umsóknin sem slík virtist klæðskerasaumuð fyrir einhvern sérstakan þegar hún er skoðuð með gleraugum mannauðsstjórnunar. 

Kosning oddvita hefur farið hljótt, fundagerð ekki komin  á vef sveitarfélagsins og fréttablað Vesturlands hefur ekki séð ástæðu til að birta fréttina. Það segir sína sögu. Kannast aðeins við aðferðafræðinna, liggur á að blása tíðindi um meirihlutaslit í fjölmiðla en annað fer hljóðlega fram.  Bíð þó spennt eftir að sjá frekari niðurröðun í æðstu embætti sveitarfélagsins. Síðan þarf að kjósa í allar nefndir á nýju.  

Þar sem ekki er sveitarstjóri til staðar, tíðkast gjarnan að oddviti gegni starfi hans. Það er því etv. ekki nein tilviljun sem ræður því að nýkjörinn oddviti er búinn að auglýsa eftir nýjum lækni við heilsugæsluna.  Gerði það fyrir kosninguna og áður en frestur um sveitarstjórastarfið rann út. Öllu falli sjá heimamenn  sæng sína útbreidda og margir ósáttir. Ég hef oft bent þeim á að stoðar lítt að láta í ljós óánægju sína við eldhúsborðið, í fjárkrónni eða í mjaltabásnum. Menn verð að tjá hug sinn á réttum vígstöðvum.

Að þegja vegna siðferðislegs heigulsháttar

er jafn hættulegt og óábyrgt tal.

Rétta leiðin er ekki alltaf sú vinsælasta

og auðveldasta. Að tala fyrir því sem er rétt

en óvinsælt er prófraun á siðferðisþrekið

(Margaret Chase Smith) 

Góðu fréttirnar eru hins vegar þær að  því meira návígi  við fólkið og því meiri ábyrgð, þeim mun fyrr kemur hið rétta eðli viðkomandi  og geta í ljós. Trúverðugleiki verður ekki keyptur úti í búð og orðspori er erfitt að breyta. Skiptir þá engu máli hvort það sé byggt á sönnum staðreyndum eða málatilbúnaði. Hef alla trú á því að það sé sama upp á teningnum í heimasveit minni og í borginni, kjörnir  fulltrúar beggja sveitarfélaga munu ljúka kjörtímabilinu. Að því loknu er pólitískur ferill þeirra margra á enda. Hjá sumum gæti hann endað jafnvel fyrr, hver veit

Vona að heimamenn verði ötullir við að fylgjast með framvindu mála. 

 

Ánægjulegar fréttir

Það gladdi mitt litla hjarta að lesa þessa frétt í morgun. Stytting á biðtíma og forgangsröðun í höndum fagfólks. Sjúklingar teknir beint inn í stað þess að híma á biðstofunni í miður þægilegum stólum. Mér finnst þetta svo stórkostlegar fréttir að mér finnst ástæða til að fjalla sérstaklega um þær. Skil ekki af hverju forráðamenn gerðu þessar breytingar ekki fyrr.

Ástandið búið að vera bagalegt árum saman og allflestir gerar sér grein fyrir því að það er ekki komandi á slysa- og bráðamóttökuna nema á bláum ljósum í sjúkrabíl. Fólk hefur einmitt hneykslast á mér fyrir að hafa ekki farið í sjúkrabíl forðum daga en ég er greinilega föst í gamla tímanum og finnst sjúkraflutningur vera neyðarflutningur. Það er svo annað mál.

Í öllu falli ætti að vera auðvelt að bæta aðgengi að bráðaþjónustunni með skýrum verkferlum og verkefnastjórnun.  Það er ekki flókið verkefni að greina flöskuhálsa, samræma og bæta ferlana og auka þannig afköst og stytta biðtíman. Árangurinn tvímælalaust jákvæður fyrir alla aðila, ánægðir sjúklingar og ánægt starfsfólk sem finnur að störf þeirra eru að skila árangri. Reksturinn væntanlega hagkvæmari og tíminn betur nýttur. Mistökin færri og meðferðin markvissari. Hugsanlega verður starfsmannaveltan minni og deildin eftirsóknarverðari vinnustaður.

Pólitíkusar hagnast á breytingunni með auknum vinsældum, embættismannakerfið fær jákvæðari umfjöllun og öll dýrin í skóginum vinir.

Flott framtak!

Breytingar á slysadeild

Marktæk kosning?

Ég hlýt að velta því fyrir mér hvort þessi kosning um kjarasamning aðildafélaga BSRB við ríkið sé marktæk. Einungis 33,4% atkvæðabærra manna greiddu atkvæði.  Af þessum þriðjung atkvæðabærra manna voru um 89% þeirra sáttir við samninginn. Tæplega 11% á móti.  Rúmlega 66% sáu ekki ástæðu til að nýta atkvæðarétt sinn. Ekki hægt að túlka það á annan hátt en að menn séu mjög sáttir.

Til hvers í ósköpunum var barist um atkvæðarétt okkar á síðustu öld? Fólk hefur greinilega ekkert með hann að gera miðað við þessa staðreyndir og augljóst að nóg er að stéttarfélögin annist samningagerðina með öllu.

Mér finnst ekki hægt að túlka þessa atkvæðagreiðslu með öðrum hætti en að menn séu mjög sáttir við sínar 20 þús. krónur eða sem svarar 9% hækkun launa, ef ég man rétt. Hlutfall þeirra sem kusu bendir jafnframt til yfirgnæfandi stuðnings við forystu BSRB og aðildafélaganna. 

Þó hækkandi vísitala, verðlag, eldsneytiskosnaður og hvaðeina einkenni efnahagslífið eru menn sáttir. Það myndi hljóma ansi hjákátlega ef menn færu síðan að kvarta í efnahagskreppunni eða hvað?

Ég er greinilega af gamla skólanum, er orðlaus!

Félagar í SFR samþykktu samning við ríkið