"Rasistagrýlan"

Það er ekki lengra en 3-4 mánuðir síðan að umræðan um "rasisma" á Íslandi var í algleymingi.  Enginn mátti ræða opinskátt um málefni útlendinga, rétt þeirra og fjölda í landinu, án þess að viðkomandi var ýmist stimplaður kynþáttahatari eða frjálslyndur. Sitt sýndist hverjum um það hvort væri verra.  Kosningar í nánd og brýnt að vængstífa frjálslynda sem gerðu það að baráttumáli sínu að opna umæðuna, rétta hlut útlendinga í landinu, tryggja þeim viðunandi laun, heilbrigðisþjónustu og önnur réttindi sem þykja sjálfsög í lýðræðisríki.

Frjálslyndir bentu jafnframt á að flæði þeirra inn í landið væri orðið of mikið, á of skömmum tíma, til að hægt væri að undirbúa jarðveginn og standa vel að móttöku erlends vinnuafls til landsins.  Þróunin væri of hröð og undirbúningur enginn.  Tungumálakennslu væri ábótavant og brögð væru á því að erlendir starfsmenn væru skráðir löglega og þeim borguð lág laun.  Frjálslyndir bentu einnig á að húsnæðismálum margra væri abótavant og svo lengi má telja.

Í stuttu máli þá varð fjandinn laus í samfélagsumræðunni.  Þessar áhyggjur og ábendingar frjálslynda þóttu benda eindregið til kynþáttahaturs og tóku flestir ef ekki allir stjórnmálaflokkar undir þá skoðun enda kosningar í nánd.  Enginn vildi láta kenna sig við "rasisma", skárra væri það.  Menn tóku því undir með æsingamönnum og þögðu þunnu hljóði þegar inntir eftir fyrri afstöðu til málanna.

En hvað er komið í ljós? Það þurfti alvarlegt slys um helgina til að varpa ljósi á þær staðreyndir sem allir stjórnmálaflokkarnir voru meðvitaðir um en flestir þögðu yfir.  Hér tíðkast sem sé ólöglegur innflutningur á erlendu vinnuafli, svo einfalt er það.  Þannig hefur það trúlega verið um alllangt skeið.  Vinnuafl sem er ótryggt, nýtur engra réttinda og algjörlega komið upp á sína innflytendur, á lúsarlaunum. Loksins er sannleikurinn sem allir vissu, kominn upp á borðið.  En umfjöllun fjölmiðla er hvorki í takt við alvarleika málsins né þeirrar umræðu sem átti sér stað í vor.  Hverju skyldi það sæta?  Hvernig verður tekið á málum á næstu vikum?  Það verður fróðlegt að sjá. 

Ég vona svo sannarlega að fjölmiðlar taki við sér og stundi nákvæma rannsóknarvinnu. Einhver umfjöllun um aðbúnað útlendinga átti sér stað sl.vetur og kom þá í ljós að erlendum verkamönnum var hrúgað saman í hálfköruð iðnaðarhúsnæði og þurftu að greiða fyrir það dýrum dómum.  Ég er ansi hrædd um að margt ljótt komi upp á yfirborðið þegar betur er að gáð og mér segir svo hugur að Íslendingar verði ekki stoltir af þeim aðbúnaði og kjörum sem erlendu vinnuafli er boðið upp á í dag.

Nú er að sjá hvernig nýja ríkisstjórnin tekur á málum.  Það er við ramman reip að draga þegar kemur að atvinnurekendum.  Stefna sjálfstæðismanna hefur lengi verið ljós í þessum efnum og er óbreytt.  Stefna Samfylkingarinnar hefur verið æði óljós í þessum málaflokki.  Þó ég hafi töllatrú á Jóhönnu, er ég hrædd um að stefnuleysið og sundurleitnin í flokknum muni verða henni til trafala.  Nú er að bíða og sjá til.  Gefa mönnum tækifæri. Í málum sem þessum ættu allir flokkar að sameinast undir merkjum lýðræðis og tryggja öllum jafnan rétt.

 

Athugasemdir

[Guðrún Jóna Gunnarsdóttir, 29.8.2007 kl. 22:44]

Takk fyrir það. Já, sem betur fer kemur sannleikurinn alltaf í ljós. Hann verður ekki fallegur en kannski loks hægt að taka á málum þegar hann liggur fyrir.

[Sigrún sys (IP-tala skráð) 29.8.2007 kl. 23:37]

Heyr, heyr !!!

[Sigurjón Þórðarson, 30.8.2007 kl. 09:51]

Já Grýla gamla er dauð gefist upp á bullinu.

[Guðrún Jóna Gunnarsdóttir, 30.8.2007 kl. 18:40]

Nákvæmlega! Þá er spurningin hvort hljóði breytist í mönnum og ermar verða brettar upp.  Það ætti að vera óhætt núna, kosningar yfirstaðnar og menn búnir að koma sér vel fyrir

[Gíslína Erlendsdóttir, 30.8.2007 kl. 19:51]

Ótrúlegt að þetta viðgangist í jafn litlu og meðvituðu þjóðfélagi og okkar. Og hvernig er það.....er þetta ekki refsivert, man ekki eftir að hafa heyrt að viðkomandi aðilar hafi fengið kæru.