Guðrún Jóna Gunnarsdóttir

10.4.2008 | 23:41

Fræg einn dag

Ég hef örugglega þótt nokkuð spaugileg í dag. Dreif mig upp á Skaga, síðasta staðlota annarinnar. Fikraði mig varlega niður 13 tröppurnar í stiganum hér heima, skautaði með hækjurnar utan dyra og neyddist til að skríða á hægri rasskinn niður útidyratröppurnar. Skjögraði út í bíl, skelfingu lostin og á inniskónum. Sara, systurdóttir mín, tók að sér að ferja gripinn upp á Skaga og verða honum innan handar.

Mín beið þessi líka forláti, fallega blái hjólastóll þegar að skólanum mínum var komið. Einn nemenda minna bauð mér stólinn sem gjörsamlega bjargaði mér. Var rúllað eins og kvikmyndastjörnu inn í skólan þar sem móttökunefnd beið mín til að kenna mér á lyftu hússins. Dagurinn byrjaði með prófi sem var byrjað þar sem við vorum aðeins í seinni kantinum. Allir á kafi við úrlausn prófsins þegar ég birtist eins og hver önnur stjarna í þessum fína, bláa hjólastól, klyfjuð hækjum, veski, tölvutösku og náttúrlega með fylgdarmann. Reisti mig tígulega úr stólnum, sýndi afburðahæfni á hækjunum og hlammaði mér á stól við kennsluborðið. Tókst auðvitað að vera með smá ,,senu" og rak mig utan í borðið með tilheyrandi. Ég get sagt með vissu að koma mín vakti athygli en skal ekki fullyrða um aðdáun.

Mér tókst að komast í gegnum daginn stórslysalaust, svona framan af degi, enda á fína, blá hjólastólnum og nánast útilokað að gera einhver óskunda. Brunað í bæinn á kagganum hennar Söru rétt fyrir kl.13. og beint í búð. Ískápurinn tómlegur og illa lyktandi þannig að nú var lag. Náði að klöngrast á hækjunum inn í búð, hoppaði þar og hökti, benti Söru með hækjunni á það sem ég vildi láta tína í körfuna fyrir mig, eins og hver önnur stjórstjarna og stóð mig bara býsna vel. Keypti vel inn og fílaði mig í botn, eins og börnin segja. Var í draumahlutverki mínu

Heldur vandaðist málið þegar heim var komið, fljúgandi hálka að útidyratröppunum, ég á inniskónum og engir mannbroddar á hækjunum. Var ekki alveg á því að skríða upp tröppurnar á rassinum líkt og fyrr um daginn, var harðákveðin í því að á hækjunum færi ég, með fullri reisn. Uppskar eftir því, steig óvart í brotna fótinn. ÁÁÁÁiiiiiiiiiii heyrðist um allt hverfið. Hundur hefði ekki ýlfrað hærra.

Skakklappaðist upp mínar tröppur, úti sem inni og lauk ferðinni uppistandandi. En hvernig datt mér í hug að mér tækist að fara í gegnum daginn, stórslysalaust! Sumir stinga hausnum dýpra í sandinn en aðrir. Hef ákveðið að halda mér inni við næstu daga í ljósi þessarar reynslu. Ferðast hér eftir einungis á sópnum mínum í skjóli nætur.

Flokkur: Bloggar | Breytt s.d. kl. 23:55 | Facebook

Athugasemdir

Bíddu nú, hvað var það sem ég sagði um daginn???? Bara að vera heima í sófanum á fyrstu hæð með kaffivél, sjónvarp og tölvu

Katrín, 11.4.2008 kl. 00:04

Nei, ekki beint, get það ekki þó ég vildi en vildi klára síðustu staðlotuna enda önnin að ljúka sem og nám nemenda. Þykist ómissandi

Guðrún Jóna Gunnarsdóttir, 11.4.2008 kl. 00:04

Varst það þú sem flaugst hér hjá áðan???

Hólmdís Hjartardóttir, 11.4.2008 kl. 01:06

Ekki gefast upp, taktu frekar viðráðanleg skref og eitt til, þetta kemur.

Verður orðin skondinn á þér botninn, ef þú hoppar um bæinn á honum alla daga.

Þorsteinn Valur Baldvinsson, 11.4.2008 kl. 13:25

Hæ hæ

Það er nú enginn smá dugnaður í þér kona! Ég væri heima í sófa og myndi halda mig þar, En góðan bata :)

Kveðja Ingveldur

Ingveldur (IP-tala skráð) 11.4.2008 kl. 15:44

Ó elskan mín kæra,farðu nú vel með þig það væri ekki á bætandi ef þú skyldir brjóta hina löppina líka og vera með gifs í báðaen annars hafðu það bara notalegt um helgina elsku Guðrún mínknús knús og kveðjur

Linda Linnet Hilmarsdóttir, 11.4.2008 kl. 18:02

Takk fyrir kveðjunar öll sömul.

Hef heldur betur tekið út mína refsingu fyrir gærdaginn, sofið út í það endalausa og ekki gert handtak að viti í dag. Þarf í alvöru að fara að huga að þrýstingsárum og líkamshollingu. Botninn þegar orðinn skondinn Þorsteinn, göngulagið býður ekki upp á annað.

Guðrún Jóna Gunnarsdóttir, 11.4.2008 kl. 23:42

Guðrún viltu að ég komi og snúi þér?

Hólmdís Hjartardóttir, 11.4.2008 kl. 23:56